कक्षा ११ को अनिवार्य नेपाली विषयको पाठ्यक्रमअनुसार सुनाइ, बोलाइ, पढाइ तथा लेखाइका सिप विकास हुने गरी साहित्यका कविता, कथा, निबन्ध, जीवनी, चिठी, नाटक, रिपोर्ताज, संवाद, दैनिकी र वक्तृताका साथै शब्दभण्डार, व्याकरण, बोध तथा अभिव्यक्तिसम्बन्धी छलफल तथा विश्लेषण गरी शिक्षक र विद्यार्थीबिचको अन्तरक्रियात्मक भिडियो बनाइएको छ । भिडियोका माध्यमबाट विषयवस्तुलाई सरल, प्रभावकारी र रोचक तरिकाले बुझाइएको छ ।
पाठका गाह्रा शब्दका अर्थ, वाक्यमा प्रयोग, पर्यायवाची तथा विपरीतार्थक शब्द, शब्दनिर्माण एवम् शब्दस्रोत जस्ता कुरा शब्दभण्डारअन्तर्गत छलफल गरिएको छ । उखानटुक्का तथा पारिभाषिक/ प्राविधिक शब्दको अर्थ र प्रयोगबारे शब्दभण्डारकै शैलीमा छलफल गरिएको छ । त्यस्तै शब्दभण्डार बढाउन सजिलो होस् भनी शब्दकोशको प्रयोग गर्न सिकाइएको छ ।
साहित्यअन्तर्गत वासुदेव त्रिपाठीको ‘वीर पुर्खा’ (कविता), इस्मालीको ‘गाउँको माया’ (कथा), सुधा त्रिपाठीको ‘संस्कृतिको नयाँ यात्रा’ (निबन्ध), ‘योगमाया’ (जीवनी) ‘साथीलाई चिठी’ (पत्र), भवानी भिक्षुको ‘त्यो फेरि फर्कला ?’ (कथा), ‘पर्यापर्यटनका सम्भावना र आयाम’ (निबन्ध), सुरेन्द्र नकर्मीको ‘लौ आयो ताजा खबर’ (नाटक), ‘सफलताको कथा’ (रिपोर्ताज), ‘कृषिशालामा एक दिन’ (संवाद), ‘रारा भ्रमण’ (दैनिकी) तथा ‘जलस्रोत र ऊर्जा’ (वक्तृता) पाठको आवश्यक छलफल तथा विश्लेषण निकै सरल र प्रभावकारी ढङ्गले गरिएको छ ।
व्याकरणअन्तर्गत वर्ण र वर्णका प्रकार छुट्याउन, पदवर्ग पहिचान गर्न तथा वर्णविन्यासगत त्रुटि पहिचान गरी शुद्ध पार्न सिकाइएको छ । उपसर्ग, प्रत्यय, समास, द्वित्व तथा सन्धि प्रक्रियाबाट शब्दनिर्माण गर्न तथा कथन, ध्रुवीयता, लिङ्ग, वचन, पुरुष र आदर आदिका आधारमा वाक्य परिवर्तन गर्न सिकाइएको छ । त्यस्तै उद्देश्य र विधेय पहिचान गर्न पनि सिकाइएको छ ।
बोध र अभिव्यक्ति अन्तर्गत बोध, बुँदाटिपोट, सारांश, प्रतिवेदन, टिप्पणी, विवेचनात्मक उत्तर लेखनको सिप सिकाइएको छ । चिठीका विभिन्न प्रकार, निमन्त्रणापत्र, बधाई, शुभकामना, सम्मानपत्र, समवेदना, श्रद्धाञ्जली, सूचना, विज्ञापन पनि कसरी लेख्ने भन्नेबारे छलफल गरिएको छ । त्यस्तै सिर्जना र परियोजनामा कविता, कथा, निबन्ध, संवाद, दैनिकी, वक्तृता लेख्न सिकाइएको छ । आन्तरिक मूल्याङ्कनको परिचयसहित परियोजना कार्य, सुनाइ, बोलाइ, लेखाइ र पढाइका विभिन्न अभ्यास पनि गराइएको छ ।
Download the mySecondTeacher app today.
